अंश

मेरो छोरा.... !!
धेरै अबेर गरेउ तिमीले ।

तिमीलाई अंश दिँउला भनेर
जतन सङ्ग लुकाई राखेको,
कसैलाई नदेखाई राखेको
मेरी आमाको जिब्रो,
चुडिएर एक पछी अर्को गर्दै
मिसिएर एक देखी अनेक हुँदै
आजै शब्दकोष रित्तिइ सक्यो
खै कसो होला भोली  ??

तिमीलाई अंश भनी
मेरो नजरभित्र छुपाई राखेको
मेरो हृदय भित्र लुकाई राखेको
एउटा पुरानो तस्बिर मेरै गाँऊको
मैले भाँडा-कुटी खेलेको ठाँऊको
मलाई दाइजो मेरै बाउको
आजै रोगन उडिसकेछ
खै कसो होला भोली ?

मेरो छोरा.... !!
धेरै अबेर गरेउ तिमीले....

मेरो छाती भित्रको पुरानो सन्दुकमा
खिया पेरिसकेको नेपालिपन्
त्यस्तै छ कि छैन अझै कोनि
खोली हेर्नु , त्यही हो तिम्रो अंश.... !!